Trupat ruse kanë hedhur në lindje të Ukrainës bomba me fosfor të bardhë, deklaroi kreu i administratës ushtarake ukrainase në Luhansk, Sergey Gaidai. “Rajoni është goditur gjatë natës me raketa dhe bomba me fosfor. 4 viktima e dhjetëra të lënduar raportohen deri tani, ndërsa shumë ndërtesa u shkatërruan”, u shpreh ai. Një ditë më parë, administrata e Presidentit Biden e akuzoi zyrtarisht Rusinë për kryerjen e krimeve të luftës në Ukrainë dhe tha se do të punonte me vende të tjera për të ndjekur penalisht . Përcaktmi i qeverisë amerikane u bazua në një "shqyrtim të kujdesshëm" të burimeve publike dhe të inteligjencës, që kur Rusia nisi sulmin e saj në Ukrainë muajin e kaluar, u shpreh sekretari shtetit, Antony Blinken. Përdorimi i armëve kimike, i paralajmëruar prej SHBA-së, nëse vërtetohet, do të përbënte një shkelje të vijave të kuqe për Rusinë. Numri dy i policisë së Kievit, Oleksiy Biloshytskiy, insiston se Moska ka përdorur municione me fosfor në Kramatorsk, në mesin e frikës se i acaruar nga dështimet në terren, Vladimir Putin mund të kalojë tek armët kimike. Dita e sotme shënoi një muaj nga fillimi i sulmit rus në Ukrainë. Ne ende po presim për hapa të qënësishëm nga NATO e BE, tha Volodymir Zelensku, i cili bëri gjithashtu thirrje që kjo datë të shënohet me proetsta anembanë globit.