Një sherr masiv ka ndodhur në qytetin e Bilishtit dhe për pasojë janë plagosur dy persona. Ngjarja ka ndodhur në rrugë, ku siç duket edhe nga pamjet filmike të kamerave të sigurisë në zonë 3 persona kanë goditur dhe dhunuar me sende të forta një person duke i shkaktuar dëmtime në trup. Nga ana tjetër, pas sulmit, i dëmtuari ka nxjerrë thikën dhe ka goditur njërin prej dhunuesve. Burime bëjnë me dije se Trajan Çeliku, i njohur nga policia si person problematik, së bashku me dy persona të tjerë, kanë dhunuar një 39-vjeçar me inicialet G.M. Konflikti dyshohet se ka ndodhur për prishje pazaresh që lidhen me aktivitet kontrabande, ndërsa nuk ka qenë hera e parë që autorët të përfshihen në konflikt me 39-vjeçarin. Konflikti ka nisur verbalisht e më pas ka përfunduar në përdorimin e sendeve të forta. Sipas të dhënave Trajan Çeliku ka pasur me 39-vjeçarin paraditen e sotme një konflikt e më pas, ka shkuar sërish për ta takuar me dy persona të tjerë. Gjatë sherrit, 39-vjeçari e ka goditur me thikë pas sulmit të personave. Në video duket momenti kur personat përfshirë Trajan Çelikun, sulmojnë për herë të dytë, 39-vjeçarin Guri Mazelliu, duke i bërë pritë në afërsi të qendrës së qytetit të Bilishtit. Siç duket dhe nga pamjet, ata mbajnë në dorë shkopinj bejsbolli dhe sulen drejt mjetit të Mazelliut. Mësohet se pas mjekimit në spital, të gjithë janë shoqëruar në komisariatin e Devollit ku do të merren në pyetje e do të zbardhet gjithë dinamika e ngjarjes.