Trupa e gjyqtarëve të Gjykatës Kushtetuese të Shqipërisë zhvilloi një takim me kreun e Delegacionit të Bashkimit Evropian në Shqipëri, Silvio Gonzato. Kryediplomati i BE vlerësoi punën e Gjykatës Kushtetuese, ndërsa theksoi mbështetjen e mëtejshme të unionit. “Bashkimi Evropian do të vijojë të mbështesë reformën në drejtësi dhe Gjykatën Kushtetuese në ruajtjen e pavarësisë dhe eficencës së saj”, tha ambasadori i BE, duke shtuar se “në procesin e anëtarësimit të Shqipërisë në Bashkimin Evropian, Gjykata Kushtetuese ka rol thelbësor, pasi garanton balancimin e pushteteve, verifikon respektimin e shtetit të së drejtës dhe jep drejtësi për qytetarët”. Gjyqtarët kushtetues evidentuan rëndësinë e dialogut ndërinstitucional, sfidat me të cilat po përballet sot sistemi i drejtësisë në Shqipëri, si dhe përpjekjet e vazhdueshme që duhet të bëhen për ruajtjen e pavarësisë dhe integritetit profesional, forcimin e njohurive dhe përshtatjen me zhvillimet e reja për integrimin e vendit tonë në BE.