Nw një dokument strategjik të Bashkimit Evropian thuhet se Siguria e Ballkanit Perëndimor nuk mund të merret si punë e kryer. Puna në përpilimin e këtij dokumenti kishte nisur para dy vjetësh, por sulmi Rusisë ndaj Ukrainës ka ndikuar në versionin përfundimtar të tij. Ministrat e Jashtëm dhe ata të Mbrojtjes të shteteve anëtare të BE-së kanë miratuar në takimin e tyre në Bruksel dokumentin strategjik për vizionin e sigurisë në dhjetëvjeçarin e ardhshëm të titulluar si “Kompasi strategjik”. Përfaqësuesi i lartë i BE-së për Politikë të Jashtme dhe Siguri, Josep Borrell, ka thënë se kur është nisur puna në këtë dokument strategjik, askush nuk ka mundur ta marrë me mend se me çfarë sfidash do të përballemi sot. Në dokument, BE-ja zotohet që të punojë me parterët në tërë botën për të forcuar sigurinë dhe për të mbrojtur vlerat e përbashkëta. Në këtë drejtim, blloku evropian ka përmendur Shtetet e Bashkuara, Kanadanë, Britaninë e Madhe, Japoninë, por edhe Ballkanin Perëndimor dhe vendet e fqinjësisë. Situata dhe sfidat e sigurisë në Ballkanin Perëndimor, sidomos kriza e brendshme në Bosnje e Hercegovinë dhe dialogu për normalizimin e raporteve mes Kosovës dhe Serbisë, janë përmendur po ashtu në këtë dokument strategjik të BE-së.