Joe Biden është ulur sot në Gjenevë të Zvicrës me avionin presidencial ‘Air Force One’ para samitit të shumëpritur me presidentin rus Vladimir Putin. Qyteti zvicerjan është gjithashtu ndalesa e fundit e turneut evropian, i pari udhëtim si president i SHBA, teksa tensionet mes Moskës e Uashingtonit mbeten të larta. Biden është tërhequr së fundmi nga disa komente të ashpra të mëparshme ndaj Putin, duke e quajtur “një kundërshtar i denjë”. Dje Biden nuk i kurseu komplimentat për homologun rus, duke e quajtur “të zgjuar” dhe “të fortë”. “E kam pasur përballë Putinin. Është i mprehtë dhe i fortë, dhe nga sa kam arritur të zbuloj, është praktikisht një kundërshtar i denjë”, tha Biden. Biden përcolli gjithashtu një paralajmërim për Putinin teksa i kërkoi shefit të Kremlinit të heqë dorë nga aktet provokuese ndaj Shteteve të Bashkuara dhe aleatëve.