Pak orë pas varrimit të 59 të rinjve që humbën jetën ën diskotekën e palicencuar që u dogj në Koçan të Maqedonisë së Veriut, u arrestuan tre ish-kryetarë të kësaj bashkie. I pari u prangos kryetari i dorëhequr pak ditë më parë, Ljupço Papazov dhe më pas prokuroria konfirmoi se edhe dy ish-kryetarë të mëparshëm të bashkisë së Koçanit, Nikolço Iliev dhe Ratko Dimitrovski janë arrestuar, pasi dyshohet se janë të përfshirë në tragjedinë me 59 viktima në klubin “Pulse”. Autoritetet vendëse konfirmuan se një aksion i ekipeve policore është duke u zhvilluar me urdhër të Prokurorisë Themelore Publike të Koçanit lidhur me procedurën e zjarrit në klubin “Pulse” dhe se operacioni do të vazhdonte edhe gjatë natës. Ndërsa gjatë ditës së enjte qindra persona përcollën për në banesën e fundit 59 viktimat që humbën jetën nga zjarri që kaploi një klub nate më 16 mars në Koçan. Në cermoninë mortore që u mbajt në qytetin ku ndodhi tragjedia, iu dha lamtumira e fundit 27 të rinjve, ku shumë qytetarë ndanë dhimbjen me familjarët e viktimave. Në Shtip, Probishtip, Strumicë e Shkup, po ashtu u mbajtën ceremoni varrimi për viktimat e tjera. Maqedonia e Veriut është në javë zie që nga e diela kur ndodhi tragjedia. Në sheshin kryesor janë të vendosura fotografitë e të rinjve që vdiqën si pasojë e zjarrit. Qytetarë të shumtë nderuan ata derisa mes lotësh e pikëllimi, shumë prej tyre shprehën edhe mllefin ndaj institucioneve, duke kërkuar përgjegjësi për tragjedinë.