Përgjegjësinë për sulmin e morën rebelët Houthi, të cilët e cilësuan atë si hakmarrje për bombardimet saudite në Jemen. Një prej përfaqësuesve të tyre më të njohur, Mohammed al-Bukhaiti, akuzoi Riadin se kishte kryer qindra sulme ajrore që kishin shkaktuar viktima mes civilëve, përfshirë fëmijë. Koalicioni ushtarak i udhëhequr nga Arabia Saudite e dënoi goditjen e terminalit të pasagjerëve si një “krim lufte”. Reagimi saudit nuk vonoi. Avionët luftarakë të koalicionit ndërmorën sulme të reja kundër pozicioneve të Houthive në Jemen, e sipas televizionit Al Masirah, dy civilë u vranë dhe një tjetër u plagos gjatë një bombardimi mbi një treg në provincën Taiz.. Ndërkohë, në Saada, avionët sauditë kryen gjashtë sulme në distriktin Majz brenda më pak se një ore. Presidenti amerikan Donald Trump nuk përjashtoi mundësinë e përfshirjes së Shteteve të Bashkuara në operacionet ushtarake kundër Houthive. “Po e ndjekim me kujdes situatën. Sapo jemi informuar për sulmin e fundit, ndaj do të marrim një vendim. Ne veprojmë shumë shpejt”, deklaroi Trump para gazetarëve në Shtëpinë e Bardhë. Presidenti amerikan e cilësoi sulmin “të tmerrshëm” dhe “të papranueshëm”, ndërsa sekretari i Shtetit, Marco Rubio, dënoi goditjet që, sipas tij, përbëjnë një shpërfillje flagrante për jetën e civilëve të pafajshëm. Organizata e Kombeve të Bashkuara paralajmëroi se sulmi ndaj aeroportit të Riadit përbën një përshkallëzim serioz të konfliktit. I dërguari i posaçëm i OKB-së për Jemenin, Hans Grundberg, deklaroi se veprime të tilla kërcënojnë sigurinë rajonale, ushqejnë ciklin e dhunës dhe ndërlikojnë përpjekjet për paqe. Ai u bëri thirrje Houthive të ndalin sulmet ndaj objektivave civile në Arabinë Saudite. Ndërkohë, ambasada amerikane në Riad ka rritur nivelin e alarmit për shtetasit e saj dhe ka vendosur kufizime për përdorimin e aeroporteve saudite nga personeli qeveritar amerikan. Punonjësit e qeverisë amerikane duhet të marrin autorizim të posaçëm për të përdorur aeroportet e Riadit, Xhedës dhe Dammamit. Edhe Italia, Gjermania, Spanja dhe Kanadaja u kanë rekomanduar shtetasve të tyre të shmangin udhëtimet jo të domosdoshme drejt aeroportit të Riadit.