Rreth 760 fluturime u anuluan në aeroportin e Mynihut të shtunën për shkak të reshjeve të mëdha të borës, raporton media e njohur CNN. Autobusët, tramvajet dhe disa linja të trenave në Mynih pezulluan shërbimin gjithashtu për shkak të borës, sipas kompanisë së transportit publik të qytetit. Stacioni qendror i trenit i Mynihut u mbyll për mbërritjet, ndërsa shërbimet në distanca të gjata janë pezulluar tërësisht, sipas kompanisë hekurudhore kombëtare gjermane Deutsche Bahn. Deutsche Bahn paralajmëroi se trafiku hekurudhor do të "ndikohet rëndë" deri të hënën. Policia të shtunën u kërkoi njerëzve në Mynih që të mos përdorin makinat e tyre nëse nuk është absolutisht e nevojshme, ndërsa banorëve të disa pjesëve të Bavarisë jugore iu tha që të mos largoheshin fare nga shtëpitë e tyre. Transmetuesi publik bavarez “Bayerischer Rundfunk”(Bajerishe Rundfunk) raportoi të shtunën se trashësia e dëborës arriti në 44 centimetrat në Mynih, në një nga reshjet më të mëdha të regjistruara ndonjëherë në kryeqytetin e shtetit bavarez që nga fillimi i regjistrimeve në vitin 1933.