Administrata e Presidentit Joe Biden akuzoi zyrtarisht të mërkurën Rusinë për kryerjen e krimeve të luftës në Ukrainë Sekretari i Shtetit Antony Blinken tha se do të punonte me vende të tjera për të ndjekur penalisht shkelësit. “Ne kemi parë raporte të shumta të besueshme të sulmeve pa dallim ndaj civilëve, si dhe mizori të tjera. Forcat ruse kanë shkatërruar ndërtesa banimi, shkolla, spitale, infrastrukturë kritike, automjete civile, qendra tregtare dhe ambulanca, duke lënë mijëra civilë të pafajshëm të vrarë ose të plagosur”, tha zoti Blinken. Përcaktimi i qeverisë amerikane u bazua në një "shqyrtim të kujdesshëm" të burimeve publike dhe të inteligjencës, që kur Rusia nisi sulmin e saj në Ukrainë muajin e kaluar, tha ai. Ai përmendi sulmet ndaj popullatës civile në qytetin e rrethuar të Mariupolit dhe në zona të tjera. “Sikurse me çdo krim të supozuar, një gjykatë që ka juridiksion mbi krimin është përgjegjëse për përcaktimin e fajit për rastet specifike”, shtoi sekretari.