Për aksidentin tragjik ku humbën jetën 3 shtetas shqiptarë, autoritetet greke kanë marrë nën hetim shoferin bullgar të kamionit që u përplas me mjetin ku ushëtonin Viktor Bushi, Klarenc Kacaj dhe Marianka Bushi, të tre të vdekur dhe Magdalena Kacaj, e cila po merr ndihmë mjekesore në spital. Në spital ku shoferi bullgar po merr trajtim mjekësor, iu komunikua sot akuza për “vrasje nga pakujdesia”, “dëmtim i rrezikshëm nga pakujdesia” dhe “drejtim i rrezikshëm mjeti”. Aksidenti i rëndë me tre viktima që ndodhi mesditën e 18 gushtit, në autostradën Egnatia, mund të ishte shmangur po të mos ishte përfshirë në flakë automjeti ku ndodheshin tre shqiptarët. Mediat greke kanë zbardhur edhe rezultatet e ekspertizës mjeko-ligjore. Siç shpjegoi mjeku ligjor, automjeti ku udhëtonin shqiptarët u përplas dhe më pas u përfshi nga flakët, çka solli djegien e trupave të tre personave që ndodheshin brenda. Sipas ekspertizës, vdekja e tyre u shkaktua nga zjarri, megjithatë edhe dëmtimet e pësuara gjatë aksidentit rrugor ishin shumë të rënda. Mjeku ligjor sqaroi se shqiptarët humbën vetëdijen pas plagëve të marra dhe të tre ishin pa ndjenja në momentin kur shpërthyen flakët.