Një aksident i rëndë ndodhi pasditen e të hënës në autostradën Fier-Vlorë, me pasojë vdekjen e një personi, ndërsa një tjetër mbeti i plagosur rëndë. Ngjarja u shënua pranë fshatit Panaja, kur një makinë goditi nga pas një kamionçinë dhe drejtuesi i kësaj të fundit, 62-vjeçari Ferdinant Hasani, humbi kontrollin dhe u përplas me trafikndarësen, duke ndërruar jetë në vendngjarje. I plagosur rëndë mbeti edhe pasagjeri i kamionçinës, i cili u transportua me urgjencë në Spitalin e Vlorës. Forca të shumta policore dhe zjarrfikësit mbërritën në vendngjarje për të bërë të mundur nxjerrjen e trupit të pajetë, që mbeti i bllokuar në mjet. Zjarrfikësit prenë pjesën metalike të kabinës së kamionçinës, që ishte shkatërruar plotësisht nga përplasja, dhe nxorën trupin e pajetë të 62-vjeçarit. Ndërkohë, nga hetimet e policisë në vendngjarje rezultoi se në makinën që shkaktoi aksidentin ndodheshin dy shtetas të huaj, ku drejtuese ishte një vajzë 28-vjeçare, e cila është shoqëruar në komisariat. Policia vijon hetimet për zbardhjen e plotë të rrethanave të aksidentit të rëndë.