Legjenda amerikane e tenisit, Andre Agassi humbi tre ndeshjet e para kundër Boris Beckerit, por pastaj arriti që gjithmonë ta mposhte. Sekretin e tregoi vetëm tani. Krejt rastësisht, kishte kuptuar nga nje gjest i kundërshtarit se në cilin anë do ta kryente ai shërbimin. “ E pashë nga mënyra si lëvizte gjuhën se pikërisht në atë anë godiste. Nuk po bëj shaka, ishte një lloj rutine që e bënte pa vetëdije. Kur përgatitej për shembull, për shërbimin nga e djathta, gjuha e tij dilte mbi cepin e buzës në të djathë”, pohon Agassi. Kur e mësoi hilenë, amerikani arriti të zbrapste sulmet e kundërshtarit të tij të fortë, por ndërkohë me veten kishte edhe një sfidë tjetër. Borisi nuk duhet ta kuptonte që ai arrinte t`i parashikonte lëvizjet e tij. “ Kjo ishte pjesa më e vështirë, ai nuk duhet të merrte vesh asgjë. Ndaj më duhet t`i rezistoja tundimit që ta shfrytëzoja këtë informacion të vyer përgjatë gjithë ndeshjes, e të mjaftohesha me përdorimin e tij vetëm në momente të caktuara”, është shprehur ai. Agassi fitoi tetë herë rresht ndaj Beckerit, duke përfshirë këtu dhe duelet e profilit të lartë mes tyre në US Open të 1990-tës dhe gjysmë finalet e French Open. Pamjet: AFP