Evakuimet nga zonat e përmbytura në Dubai vijuan edhe këtë të enjte, teksa Mbrojtja Civile shpërndau ushqime te familjet e prekura. Një stuhi e pazakontë, më reshjet më të rënda në 75 vite, goditi Emiratet e Bashkuara Arabe dhe Omanin këtë javë duke përmbytur autostradat e shtëpitë, dukë bllokuar njerëzit në shtëpitë e tyre. Të paktën 20 persona u raportuan të vdekur në Oman, ndërsa një tjetër u raportua se vdiq nga përmbytjet në Emiratet e Bashkuara Arabe që mbyllën zyrat qeveritare dhe shkollat për ditë të tëra. Reshjet janë të rralla në Gadishullin Arabik, i cili njihet për klimën e thatë të shkretëtirës, ku temperaturat e ajrit arrijnë deri në 50 gradë Celsius. Por Emiratet e Bashkuara Arabe dhe Omani kanë mungesë të sistemeve të kullimit për të përballuar shirat e dendur. Pas stuhisë, u ngritën pyetje nëse mbjellja e reve, një proces që Emiratet e Bashkuara Arabe kryejnë shpesh, mund të ketë shkaktuar shirat e dendur. Mbjellja e reve është një proces në të cilin kimikatet futen në re për të rritur reshjet në një mjedis ku mungesa e ujit është një shqetësim. Por agjencia meteorologjike e Emirateve të Bashkuara Arabe tha për Reuters se nuk ka pasur operacione të tilla përpara stuhisë. Ndërkohë, sipas ekspertëve, reshjet e mëdha u shkaktuan nga ndryshimet klimatike. Shkencëtarët e klimës thonë se rritja e temperaturave globale, e shkaktuar nga ndryshimet klimatike të udhëhequra nga njerëzit, po çon në ngjarje më ekstreme të motit në mbarë botën, duke përfshirë reshjet intensive.