Ekzekutivi gjerman vendosi të tërheqe frenën e emergjencës në betejën kundër rritjes së rasteve të Covid 19, dhe në vend të një sistemi “me arna”, t`i kalojë vendimet në një dorë të vetme. Anëtarët e kabinetit aprovuan ndryshime ligjore që i japin më shumë pushtet qeverisë federale për zbatimin e rregullave anticovid në landet gjermane. Këto ndryshime, duhet të marrin tani OK-in përfundimtar në parlament. Nëse aprovohen, ato nënkuptojnë se cdo rajon i cdo landi me një incidencë të lartë të rasteve të Covid 19 do të duhet të zbatojë rregullat uniforme të vendosura nga qeveria e Angela Merkelit. Nëse të gjitha landet do ta kishin respektuar "frenën e emergjencës” në rast të rritjes së infektimeve, atëherë nuk do të ishte problem një rishpërndarje e kompetencave në luftë kundër pandemisë. Fjala ishte për rikthimin e kufizimeve, nëse shifrat e infektimeve me Corona në rajone të caktuara do të kalonin një vlerë të caktuar. Në raste nevoje madje do të vendosej edhe ora e ndalimqarkullimit. Por në shumë raste, frena nuk u shkel dhe tani federate e landet së bashku, ranë dakort të ndryshojnë ligjin për mbrojtjen nga infeksionet. Për Gjermaninë nuk është gjë e vogël ndryshimi i kompetencave të federatës dhe landeve. Landet me kompetenca të fuqishme dolën si një mësim nga koha e nacionalsocializmit, kur u mësua se asnjëherë më nuk duhej të qeverisej në mënyrë centraliste pa kufizim. Por rezultati i gjendjes aktuale ishte që vendi përfundoi si një qilim “me arna”, me masa të ndryshme nga landi në land dhe konkurrencë landesh për politikën e duhur kundër koronavirusit, herë lirim masash, e herë ashpërsim të fortë.