Arabia Saudite, po ndërton një mega-qytet të së ardhmes, 500 miliardë dollarësh, të mbushur me taksi fluturuese, robotë shërbëtorë dhe madje edhe me një hënë artificiale të vetën... Neom do të jetë një metropol ultra modern, në kontrast të plotë me pjesët e tjera shumë konservatore të mbretërisë në shkretëtirë. I mbështetur nga fondi i investimeve private i Arabisë Saudite, grupi që ka blerë Neëcastle United, me një shumë prej jo pak, por 500 miliardë dollarësh, planet për qytetin Neom janë aq ambicioze sa që një pjesë e teknologjisë së tij, nuk ekziston ende... Qyteti do të vendoset në kufirin me Jordaninë dhe Egjiptin dhe do të fillojë të presë banorë dhe biznese duke filluar nga 2025-a. Ai po ndërtohet nga hici, do të furnizohet me energji diellore dhe energji që vjen nga era dhe do të jetë 17 herë më i madh se Londra. Sipas presidentit të Neom, princit të Kurorës Mohammed Bin Salman, i njohur edhe me inicialet e tij MBS, zona urbane do të jetë miqësore për dronët dhe një qendër për zhvillimin e robotikës. Projektet paraprake tregojnë se qyteti do të ketë taksi fluturuese, një mjet ky i përshkruar në filmat fantashkencorë si Blade Runner apo Udhëtim në të ardhmen II. E projektet tregojnë se ngarja e makinës atje do të jetë thjeshtë për argëtim, dhe jo më për transport... Sauditët duan të tërheqin profesionistët më të mirë dhe më të shkëlqyer në qytet dhe të krijojnë një qendër të madhe komerciale, që do të rivalizojë Dubain në emiratet e bashkuara Arabe apo Dohan në Katar. Dokumentet thonë se robotët shërbëtorë do të pastrojnë shtëpitë e punonjësve të huaj që do të paguhen shumë, e kjo do të thotë se ata nuk do të duhet të shqetësohen për mirëmbajtjen e shtëpive.