Koalicioni opozitar ka dhënë shenjat e para të mosbesimit, kur na ndajnë 23 ditë nga zgjedhjet parlamentare të prillit. Në mbledhjen e Komisionit Qendror të Zgjedhjeve, përfaqësuesit e LSI-së dhe PDIU-së debatuan ndërmjet tyre se cilës prej partive i takon numëruesi i katërt i votave. Duke iu referuar rezultatit të zgjedhjeve të vitit 2017, PDIU pretendoi se numëruesi i katërt në grupet e numërimit të votave duhet të ndahej me short me LSI pasi të dyja partitë ishin forca opozitare. Por, përfaqësuesi i LSI-së, Altin Kaziaj u shpreh kundër duke ngritur si pretendim se vetë PDIU nuk ka listën e vetë të kandidatëve në fletën e votimit pasi është nën siglën e Partisë Demokratike. “Nuk e kuptoj qëndrimin e LSI-se, ligji e ka të përcaktuar qartë kujt i takon numëruesi”, u shpreh Shkëlqim Sulo, përfaqësues i PDIU”. “Këtu në fletën e votimit ne nuk do të shohim siglën e PDIU-së. Çfarë do të numëroi numëruesi i PDIU-së. Siglat e tjerë?! Çfarë do të garantojë numëruesi i PDIU-së?! Votat e LSI-së?! Votat e PSD-së?! votat e PS-së?! Ja është logjikë e thjeshtë”, u shpreh Kaziaj. Argumentet e përdorura nga përfaqësuesi i LSI-së duket se e bindën kryekomisionerin, Ilirjan Celibashi, i cili vendosi që këtë numërues ta marrë LSI. Ne baze te vendimit ne zgjedhjet parlamentare nga katër numërues votash që do të ketë një tavolinë, 2 janë të PS-së, një të PD-së një të LSI-së.