Kockat që i përkasin një “lloji të ri të njeriut të hershëm” të panjohur më parë për shkencën janë gjetur në Izrael, thanë studiuesit, duke pretenduar se kanë hedhur dritë të re në evolucionin njerëzor. Gërmimet në guroren e një fabrike çimentoje pranë qytetit qendror të Ramlës në Izrael zbuluan mbetje prehistorike që nuk mund të përputheshin me asnjë specie të njohur nga gjinia Homo. Studiuesit nga Universiteti i Tel Avivit dhe Universitetit të Jeruzalemit e quajtën “zbulim të jashtëzakonshëm” “llojin Nesher Ramla Homo” në një studim të botuar në revistën Science. Fosilet datojnë midis 140,000 dhe 120,000 vjet më parë, dhe ekipi beson se lloji Nesher Ramla do të ishte mbivendosur me Homo sapiens, prejardhja e njerëzve modernë. “Morfologjia e njerëzve Nesher Ramla ndan tipare me Neandertalët … dhe Homo arkaik”, thanë studiuesit në një deklaratë. “Në të njëjtën kohë, ky lloj është shumë ndryshe nga njerëzit modernë – duke shfaqur një strukturë krejtësisht të ndryshme të kafkës, pa mjekër dhe dhëmbë shumë të mëdhenj”. Së bashku me mbetjet njerëzore, gërmimi zbuloi sasi të mëdha të eshtrave të kafshëve, si dhe mjete guri. Studiuesit sugjeruan që disa fosile të zbuluara më parë në Izrael që datojnë deri në 400,000 vjet mund t’i përkasin të njëjtit lloj njerëzor parahistorik.