Prej rreth 1 viti e gjysmë është formuar ekipi i parë i vajzave të mundjes, të cilat kanë marrë pjesë në disa aktivitete mbarëkombëtare dhe në kampionatin Ballkanik të vitit të kaluar. Së fundmi, Ekipi Kombëtar Shqiptar u përfaqësua nga gjashtë sportiste femra në Kampionatin e Kupës së Shqipërisë “Muhamet Malo”, të zhvilluar në parkun olimpik “Feti Borova” në Tiranë, nga të cilat të gjashta u vlerësuan me medalje të vendit të parë dhe të dytë. Trajneri që i ka stërvitur këto vajza por edhe shumë mundës të tjerë ndër vite është Altin Kurti. Në Shqipëri akoma duket si një tabu që të flasësh për vajza mundëse por kjo nuk është hera e parë që ato dalin me rezultate shumë të mira në këtë disiplinë. Para disa mujash Tea Sulo në kategorinë 57kg dhe Anxhela Imeraj në kategorinë 59 kg patën një tjetër garë në Pallatin e Sportit “Asllan Rusi”, në kuadër të Kampionatit Ballkanik të Mundjes për të rinj 2018. Pavarësisht përballjes me kundërshtare shumë të forta të nivelit olimpik nga Turqia, vajzat e ekipit kombëtar, ia dolën të zhvillojnë me sukses ndeshjet e tyre të para zyrtare, duke u kurorëzuar me medalje bronxi. Ekipi u rendit i dyti në klasifikim, i ndjekur nga Greqia në vend të 3-të.