Mali i Dukatit në Vlorë prej katër ditësh është përfshirë në flakët e zjarrit, duke djegur një sipërfaqe të konsiderueshme me shkurre e kullota. Vatra e zjarrit ka marrë përmasa të mëdha teksa vijon të përhapet pavarësisht ndërhyrjeve të zjarrfikseve. Burimet bëjnë më dije se zjarrfikësit e repartit të Vlorës po vijojnë punë për shuarjen e zjarrit. Megjithatë temperaturat shumë të larta, terreni i vështirë malor, shpesh edhe era e lehtë bëhet përhapëse e flakëve të zjarrit duke vështirësuar punën e zjarrfikësve. Zona e cila është përfshirë në flakë ndodhet në një mjedis aspak të lehtë për të transportuar pajisjet e secializuara për ndërhyrje. Më shumë se 80 hektarë janë shkrumbuar totalisht teksa më shumë se 10 zjarrfikës po punojnë intensivisht për të mbrojtur pjesën tjetër të sipërfaqes e cila rrezikon të digjet totalisht. Megjithëse nuk ka risk të shtuar për jetën e banorëve pasi sipërfaqja ndodhet larg zonave të banuara, nëse vijohet me këto ritme përhapjeje, më shumë se 100 hektarë rrezikohen të shkrumbohen totalisht.