Qeveria propozon lehtësimin e kushteve për përfitimin e kredisë së butë, në kuadër të programeve sociale të organeve të qeverisjes vendore. Ministria e Ekonomisë dhe Inovacionit ka propozuar ndryshime në ligjin e vitit 2018 për strehimin social, duke rritur tavanin e të ardhurave vjetore për familjet që mund të përfitojnë nga programi i kredive të buta. Sipas propozimit, tavani i të ardhurave vjetore për familje rriten nga një e gjashta e vlerës së pronës që synohet të blihet me kredi në një të dytën e vlerës së saj. Për të ilustruar më konkretisht, nëse kostoja e një banese që kërkohet të blihet përmes kredisë së butë është 100 mijë euro, niveli i të ardhurave vjetore të familjes aplikuese nuk duhet të tejkalojë 50 mijë eurot në vit. Deri më tani, ky kufi ishte pak më shumë se 16 mijë euro. Propozimi prezanton edhe garancinë sovrane, ku shteti merr përsipër të dalë garant deri në 30 për qind të principalit për të ndihmuar familjet që nuk plotësojnë të gjitha kushtet e kolateralit që të përfitojnë financimin nga bankat. Megjithatë, garancia sovrane nuk përjashton përgjegjësinë e huamarrësve për shlyerjen e plotë të detyrimeve, apo të drejtën e shtetit për të kërkuar rikuperimin e fondeve të paguara përmes garancisë.