Pas paralajmërimit për një tubim madhështor më 15 mars, Presidenti I Serbisë, Aleksander Vuçiç, u ka bërë thirrje studentëve të vendosur në kampe në qendër të Beogradit, t’iu kthehen orëve mësimore dhe të shkojnë nëpër shtëpitë e tyre. Presidenti serb takoi një grup studentësh të enjten në ndërtesën e Presidencës, të cilët i kundërshtojnë bllokadat e studentëve. Sipas mediave të huaja, ata I thanë presidentit serb se do ta marrin një vendim për kërkesën e tij për t'u tërhequr "brenda 24 orëve të ardhshme". Gjatë bisedës, Vuçiç akuzoi edhe një herë organizatorët e tubimit të së shtunës se “dëshirojnë dhunë”, por pa dhënë prova për këto pretendime. Anëtarët e shoqatës së sapothemeluar “Studentët 2.0”, të cilët kundërshtojnë bllokadat e fakulteteve, mbrëmjen e 6 marsit ngritën tenda në parkun përballë Presidencës së Serbisë dhe kanë paralajmëruar se aty do të qëndrojnë deri në plotësimin e kërkesave të tyre. Sakaq, qeveria serbe pretendon se ka plotësuar të gjitha kërkesat e studentëve në bllokadë dhe kërkon ndërprerjen e protestave.