Ushtruesja e detyrës së presidentit të Kosovës, Vjosa Osmani, tha se pret që komuniteti ndërkombëtar të reagojë ndaj “kërcënimit” të presidentit të Serbisë, Aleksandar Vuçiq, për “luftë të dhunshme”. Vuçiq tha të enjten se një konflikt i llojit të Nagorno Karabakut mund të ndodhë në Kosovë, nëse përpjekjet për kompromis dështojnë. Ai tha se zgjidhja më e mirë e mundshme është përmes dialogut, “në të kundërtën mund të na ndodhë ndonjë konflikt”. Vucic i bëri deklaratat pas një takimi me ambasadorët e vendeve të Kuintit dhe tha se Beogradi duhet të punojë për arritjen e një zgjidhjeje për kosovën përmes kompromisit. Serbia sipas tij duhet të forcohet ekonomikisht dhe ushtarakisht që të mund të ruajë veten nga agresorë potencialë. “Unë pres që Bashkimi Evropian dhe NATO-ja t'i përgjigjen këtij kërcënimi për luftë të dhunshme, të bërë nga Vuçiq”, shkroi pas këtyre deklaratave ushtruesja e detyrës së presidentit në kosovë, Vjosa Osmani në Tëitter. Nagorno Karabaku njihet ndërkombëtarisht si pjesë e Azerbajxhanit, por qeveriset nga armenët etnikë, me mbështetjen e Qeverisë armene. Luftimet për kontrollin e këtij rajoni kanë shpërthyer qysh më 27 shtator, ndonëse këtë javë është shpallur një marrëveshje për armëpushim. Pamjet: AFP