Në konferencën e jashtëzakonshme për shtyp, ku dha detaje mbi vrasjen e biznesmenit lezhjan Ardian Nikulaj, drejtori i Përgjithshëm i Policisë së Shtetit, Muhamet Rrumbullaku u ndal të flasë edhe për vrasjen e Stiven Toshkëzit në kryeqytet. Duke iu përgjigjur pyetjeve të gazetarëve, Rrumbullaku tha se është zbardhur edhe kjo ngjarje, ndaj shumë shpejt pritet të vihet në pranga Arbër Murataj, i shpallur në kërkim Axel Hoxhaj bashkë me shokun e tij Ensi Maze i bënë pritë 20-vjeçarit Stiven Toshkëzi dhe e goditën me thikë për vdekje, teksa të dy këta shtetas janë tashmë nën arrest. Megjithatë policia ka mësuar se viktima kishte pasur më herët një sherr me Arbër Muratajn, pasi i kishte ngacmuar të dashurën. Axel dhe Ensi janë shokët e Arbërit dhe nuk kanë pasur lidhje drejtpërdrejtë me Stivenin dhe të dashurën e tij, të cilët i njihnin si shokë shkolle. Arbër Murataj është djali i Admir Murataj, i cili mbeti i vrarë në grabitjen e Rinasit në vitin 2019.