Shtrenjtimi i menjëhershëm i ushqimeve e karburanteve si efekt i luftës që shpërtheu në Ukrainë në fund të muajit shkurt, solli revoltë mes qytetarëve fillimvitin e 2022. Protestat u shtrinë nga veriu në jug dhe zgjatën për disa ditë me radhë. Me pankarta në duar, protestuesit i bënin thirrje qeverisë të ulte çmimet. Në rrugën e Kombit qytetarët fikën automjetet e tyre në shenjë proteste. Brenda pak ditësh, kryeministri Edi Rama ju përgjigj protestës së qytetarëve me një paketë rezistence sociale, prej shtatë pikash, teksa deklaroi se çmimi i karburanteve do të kontrollohej nga Bordi i Transparencës.