Viti 2023 u mbyll i mbrapshtë për Berishën, pavarësisht një sërë fitoresh të korrura, deri te bashkimi i deputetëve demokratë me mbledhjen e famshme të përbashkët të datës 5 shtator. Pas heqjes së imunitetit të deputetit nga parlamenti, iu dha dritë jeshile SPAK-ut për të aplikuar ndaj tij masën e sigurisë arrest shtëpie, masë kjo e marrë pas moszbatimit të detyrimit për tu paraqitur. Kësisoj, ish-kryeministri Sali Berisha, duke nisur nga 30 dhjetori, do të mbyllej në apartamentin e tij. E nga ky moment do të fillonin ato që demokratët më pas do t’i konsideronin ditët e qëndresës. Në më shumë se 330 ditë ngujimi u mbajtën plot 329 protesta simbolike poshtë dritares së apartamentit të Berishës, të cilat u mbyllën me protestën e 26 nëntorit, ku 5 kryqëzimet kryesore të Tiranës u bllokuan nga demokratët për 3 orë.