Ishte gjëja e parë që tha Presidenti Donald Trump kur Presidenti i Ukrainës Volodymyr Zelensky doli nga makina e tij në Shtëpinë e Bardhë të premten: ‘Qenke veshur mirë sot”, tha Trump ndërsa e përshëndeti, duke iu referuar xhupit të zi në stil ushtarak të Zelenskit, me stemën e ukrainës. Zelenski nuk ka veshur më kostume, këmisha me kopsa dhe kravata, madje edhe gjatë takimeve të rëndësishme me liderët botërorë dhe në një fjalim në Kongresin amerikan, që nga fillimi i pushtimit të plotë rus të vendit të tij në vitin 2022. Udhëheqësi ukrainas ka thënë se zgjedhja e tij për të mbajtur veshje ushtarake është një shfaqje solidariteti me ushtarët që luftojnë ushtrinë ruse në vijën e parë të frontit. Por veshja e tij ka qenë prej kohësh një shkak irritimi për kritikët e ndihmës së SHBA-së për Ukrainën, dhe pas vitesh si një pikë diskutimi mes disa kritikëve të krahut të djathtë, çështja erdhi në vëmendjen globale në një mënyrë spektakolare gjatë takimit të së premtes në Zyrën Ovale me Trump dhe zëvendëspresidentin amerikan JD Vance. Një pyetje për Zelenskin nga një gazetar amerikan, u duk sikur e akuzoi atë për mosrespektim të protokollit duke mos veshur kostum dhe kjo ndryshoi menjëherë atmosferën në dhomë. Dhe pak caste më vonë, çështje më të mëdha respekti dhe mirënjohjeje nxitën përplasjen e jashtëzakonshme që pa presidentin dhe zëvendëspresidentin amerikan të qortonin aleatin e tyre evropian përpara kamerave televizive të botës. Kur nisën pyetjet e gazetarëve, Brian Glenn, kryekorrespondenti i Shtëpisë së Bardhë për rrjetin kabllor konservator Real America's Voice e pyeti Zelenskin: "Pse nuk vishni kostum? Ju jeni në nivelin më të lartë të takimeve dhe refuzoni të vishni një kostum. Shumë amerikanë kanë probleme me ju që nuk respektoni dinjitetin e kësaj zyre", vazhdoi ai.