Vera ende nuk ka trokitur zyrtarisht, teksa pritet që ky vit të jetë për turizmin shumë më mirë se viti i kaluar, për shkak se edhe pandemia duket më shumë nën kontroll, për shkak të imunizimit të tufës, apo rritjes së vaksinimeve. Gjithsesi, krimi nuk ka reshtur dhe në vetëm pak kohë atentatet mafioze kanë trokitur në Elbasan, Shkodër e Vlorë, ndërsa pak muaj më parë në Durrës. Këto janë epiqendrat e vrasjeve mafioze për larje hesapesh që nuk nisin në Shqipëri, por nga përtej kufijve. Rasti i dy ditëve më parë në Vlorë lidhej me Spanjën. Viktima kishte vetëm pak ditë i kthyer prej andej. Këto janë vetëm pak raste të krimeve që kanë ndodhur në harkun kohor të pak ditëve, por shumë më shumë kanë ndodhur që nga janari dhe nuk bëhet fjalë vetëm për vrasje, por edhe për krime të tjera, që kanë rrezikshmëri po kaq të lartë. Por përse në sezone të caktuara sikurse gjatë verës, kurba e kriminalitetit rritet? Specialistë të ndryshëm i referohen studimeve ndërkombëtare, por edhe librit "Kriminologji" që studiohet nga juristët, ku thonë se mes faktorëve nxitës llogariten edhe temperaturat e larta.