Një strukturë e re kombëtare për menaxhimin e burimeve ujore do të jetë produkti i fazës së dytë të reformës së ujit. Kryeministri Edi Rama prezantoi krijimin e operatorit kombëtar të ujit, duke pranuar se fragmentarizimi në emër të decentralizimit të sisitemit të shpërndarjes së ujit në 58 ndërmarrje nuk ishte zgjidhja e duhur. Rama: “Dua të ndajmë me publikun një hap të rëndësishëm që duam të hedhim së shpejti lidhur me krijimin e operatorit kombëtar të shpërndarjes së ujit. Kemi pasur një trashëgimi dramatike në sektorin e ujit që kërkon investime dhe administrim të përgjegjshëm dhe në këto vite kemi bërë investime të mëdha dhe kemi rritur përgjegjshmërinë e administrimit. Por, jemi të bindur dhe duke parë ecurinë e një reforme që u ndërmor pasa ca vitesh që nuk kemi arsye të humbasim kohë dhe të besojmë në një zgjidhje tjetër përveç një zgjidhje që na është sugjeruar edhe vite më parë. Fragmentimi në emër të decentralizimit i sistemit të shpërndarjes së ujit në 58 ndërmarrje ishte katastrofë.”