Përfaqësuesit ligjorë të kryebashkiakut të Tiranës, Erion Veliaj kanë depozituar në Gjykatën e Apelit të Posaçëm provat dhe pretendime të tjera që kanë dalë gjatë dhe pas seancës së datës 12 shkurt, kur shkalla e parë e gjykatës caktoi masën e sigurisë ndaj tij. Dosja me provat dhe arsyetimet e reja të avokatëve të kryebashkiakut është depozituar ditën e martë në Apel dhe do të shqyrtohen nga gjykata bashkë me ankimimin kundër masës së sigurisë arrest me burg që u la nga shkalla e parë. Ndërkohë, të mërkurën në Prokurorinë e Posaçme u paraqit Vladimir Kosta, ish deputeti i Partisë Socialiste. Në dalje ai tha për gazetarët se ishte thirrur për hetimet që po kryhen ndaj kryebashkiakut, por nuk dha më shumë detaje në lidhje me përfshirjen e tij në këtë dosje. Erion Veliaj e ka konsideruar procesin ndaj tij si politik. Ai ka kërkuar dorëheqjen e prokurorit Olsi Dado me arsyetimin se prokurori është në konflikt interesi, pasi ka marrë leje ndërtimi me firmën e kryebashkiakut.