Sipas disa njoftimeve të fundit, forcat ushtarake ukrainase kanë arritur të vendosin me sukses pozicione të reja në anën lindore të lumit Dnieper, duke nxitur spekulimet se përparimet mund të jenë një shenjë e hershme e një kundërofensive nga ana e Kievit. Instituti për Studimin e Luftës, me bazë në Uashington, raportoi të shtunën se pamjet satelitore, të publikuara nga blogerët ushtarakë pro-Kremlinit, tregojnë se trupat ukrainase kanë krijuar një bazë mbështetëse dhe "linja të qëndrueshme furnizimi" pranë qytetit Oleshky. Analistët besojnë se nëse Ukraina fillon kundërofensivën gjatë pranverës, qëllim kryesor do të ishte të arrinte në korridorin tokësor mes Ukrainës dhe gadishullit të aneksuar të Krimesë, për të cilin do të ishte i nevojshëm kalimi i lumit Dnieper në jug të vendit. Duke iu përgjigjur raporteve të mediave ukrainase, që njoftuan se vendosja e pozicioneve të tilla tregonte se kundërofensiva kishte filluar, Natalia Humeniuk, zëdhënësja e Komandës Operacionale të Ukrainës Jugore, bëri thirrje për durim. Ajo nuk e konfirmoi ose mohoi raportin e Institutit për Studimin e Luftës, duke thënë se detajet e operacioneve ushtarake në deltën e lumit Dnieper nuk mund të zbuloheshin për arsye operacionale dhe sigurie. Kryetari i caktuar ng Kremlini në rajonin e Khersonit, një nga katër rajonet e Ukrainës që Rusia i aneksoi ilegalisht në shtator, mohoi ndërkohë njoftimet se forcat ukrainase kishin krijuar një bazë në bregun lindor të lumit Dnieper. Pas më shumë se një viti që nga fillimi i sulmit rus ndaj Ukrainës, luftimet e fundit kanë arritur në një pikë ku asnjëra palë nuk është në gjendje të bëjë përparime të mëdha në terren. Por Ukraina së fundmi ka marrë armë të sofistikuara nga aleatët e saj perëndimorë, dhe trupa të reja të trajnuara rishtas në Perëndimi, duke rritur pritshmërinë për një kundërsulm.