Gjykata e Apelit e Malit të Zi e ka shfuqizuar vendimin, me të cilin 13 persona të akuzuar për përpjekje për terrorizëm, në ditën e zgjedhjeve parlamentare në vitin 2016, ishin dënuar me gati 70 vjet burg. Gjykata e Apelit pranoi ankesat e avokatëve mbrojtës të të dënuarve në shkallën e parë me aktgjykimin e Gjykatës së Lartë në Podgoricë, që u dha më 9 maj të vitit 2019. Procedimet u rikthyen në Gjykatën e Lartë, por siç thuhet në vendim, ato u rikthyen “përpara një trupi gjykues të ndryshuar plotësisht”. Mes e tyre janë edhe shtetasit rusë Eduar Shishmakov dhe Vlladimir Popov, të cilët u akuzuan se kanë kryer veprën penale të terrorizmit dhe ishin dënuar në shkallën e parë me 15 dhe 12 vjet burg. Lideri i Frontit Demokratik (DF), Millan Knezheviq dhe Andrija Mandiq, ishin dënuar me nga 5 vjet burg nën akuzën për krijimin e organizatës kriminale. Aktgjykimi është shfuqizuar edhe për 9 shtetas serbë të akuzuar. Tentativa për të kryer një “grusht shteti” në Mal të Zi, u regjistrua ditën e zgjedhjeve parlamentare, në nëntor të 2016, kur shërbimet malazeze të sigurisë arrestuan disa dhjetëra shtetas Serbë, të cilët dyshoheshin për përpjekje për të kryer aksione terroriste, në mënyrë që të përmbysnin qeverinë me një ndërhyrje të dhunshme në Parlamentin e Malit të Zi dhe për kapjen ose likuidimin e kryeministrit të atëhershëm, Milo Gjukanoviq. Sipas prokurorëve specialë, qëllimi i të akuzuarve ishte që të pengonin Malin e Zi të anëtarësohej në NATO dhe të ndryshohej me dhunë qeveria. Dy shtetas rusë, u akuzuan si organizatorë dhe financues të tentativës. Që nga shpallja e vendimit të Gjykatës së Lartë në maj 2019, në Mal të Zi kanë ndryshuar raportet me ardhjen në pushtet të një koalicioni trepalësh, të udhëhequr nga Fronti Demokratik, liderët e të cilit ishin mes të dënuarve në këtë cështje.