Një qendër e përbashkët vëzhgimi turko-ruse, që do të monitorojë armëpushimin ndërmjet Armenisë dhe Azerbajxhanit në rajonin e Nagorni-Karabakut, ka nisur nga puna. Ministri turk i Mbrojtjes, Hulusi Akar njoftoi se aty do tw stacionohen 38 oficerë. Më herët zyrtarët turq patën thënë se qendra vëzhguese do të vendoset në rajonin Aghdam të Azerbajxhanit, territor i cili u mor nga armenët gjatë konfliktit gjashtëjavor. Monitorimi i armëpushimit do të ndihmohet edhe nga dronët.“Aktivitetet tona do të intensifikohen me punën e kësaj qendre të përbashkët turko-ruse dhe ne do të përmbushim për të mbrojtur të drejtat e vëllezërve tanë azerbajxhanas”, tha ministri. Turqia dhe Rusia u pajtuan që ta krijojnë qendrën e përbashkët të vëzhgimit pak kohë, pasi në nëntor, me ndërmjetësimin e Moskës palët arritën marrëveshje armëpushimi, që i dha fund luftimeve në rajonin e shkëputur të Nagorni Karabakut. Turqia ka mbështetur në këtë konflikt Azerbajxhanin. Rreth 2,000 paqeruajtës rusë janë vendosur aktualisht përgjatë zonave të vijës së frontit dhe në zonat që lidhin Nagorni Karabakun me Armeninë.