Ministri i Jashtëm i Rusisë Sergei Lavrov tha se Mbretëria e Bashkuar dhe Franca janë të angazhuara në nxitjen e mëtejshme të konfliktit në Ukrainë me diskutimet për dërgimin e një force paqeruajtëse evropiane në terren, në rast të një marrëveshjeje paqeje. Duke folur në Katar, Sergei Lavrov tha se qasja e Evropës ndaj konfliktit insiston në përshkallëzimin dhe zgjatjen e tij, në vend që ta zbusë atë dhe të shikojë shkaqet rrënjësore. Ai tha se balanca e forcave ka ndryshuar në Evropë dhe se vendet evropiane po përpiqen ta minojnë këtë me paketa të reja të ndihmës ushtarake për Ukrainën. Lavrov tha se propozimet për paqeruajtës, të ardhur nga Londra dhe Parisi, janë një mashtrim që synon të mbushë Ukrainën me akoma më shumë armë, cka do ta tërhiqte vendin edhe më tej nën sferën e NATO-s dhe do të cenonte të drejtat e rusishtfolësve atje. Presidenti amerikan, Donald Trump, i tha gazetarëve të hënën se e kishte pyetur Vladimir Putinin në mënyrë specifike për mundësinë e një force paqeruajtëse që vepron në Ukrainë dhe se lideri rus nuk kishte asnjë problem me këtë. Por kjo deklaratë bie ndesh me mesazhet e kremlinit për këtë temë. I pyetur në lidhje me komentet, zëdhënësi i Kremlinit Dmitry Peskov hodhi dyshime mbi pretendimin e Trump, duke iu referuar një deklarate të mëparshme se një veprim i tillë do të ishte "i papranueshëm" për Moskën.