Trupat amerikane të KFOR-it janë vendosur në rrugët kryesore në pjesën veriore të Kosovës, pas rritjes së frikës për tensione dhe përplasje të reja me serbët e atjeshëm. Lëvizja vjen pasi takimi në Bruksel, mes përfaqësuesve të Bashkimit Europian, kryeministrit Albin Kurti dhe presidentit serb Aleksandër Vuçiç nuk solli asnjë marrëveshje, siç edhe pritej, ndërkohë që nga 1 shtatori Qeveria e Kosovës planifikon të vendosë masa reciprociteti ndaj Serbisë për çështjen e targave dhe dokumentacionit. Presidenti serb aleksander Vuçiç e ka përshkruar takimin me Kurtin si një prej ditëve më të rënda për Serbinë dhe popullin serb. Ndërkohë, mediat kosovare kanë raportuar se në rrugët e veriut të kosovës janë parë trupa të shtuara të KFOR-it dhe patrullat me ushtarë amerikanë janë vendosur përgjatë rrugëve kryesore që lidhin kosovën me serbinë.