Shkaqet e rrëzimit të teleferikut nga Stresa në malin Mottarone, nuk janë konfirmuar ende por ekspertët hedhin dyshime mbi mirëmbajtjen duke thënë se duket se frenat e emergjencës nuk kanë funksionuar. E ndërkohë, bilanci i viktimave në aksidentin afër Lago Maggiore në Itali, ka shkuar në 14, mes tyre edhe një fëmijë. Një tjetër fëmijë ndërkohë është në gjendje të rëndë. Aksidenti ndodhi në një shërbim transporti të pasagjerëve nga qyteti resort i Stresa-s deri në malin Mattarone, në rajonin e Piemontes. Imazhet nga vendngjarja tregonin mbetjet e rëna mbi një zonë të pyllëzuar. Pesë shtetas izraelitë janë mes viktimave – ka konfirmuar ministria e jashtme izraelite. Pjesa më e madhe e viktimave u regjistruan në vendin e aksidentit, me bilancin e viktimave që u rrit në mënyrë të vazhdueshme që nga pasditja e të dielës ndërkohë që kërkimi vazhdonte. Zyrtarët thanë se dy të mbijetuar, fëmijë të moshës pesë dhe nëntë vjec, janë transportuar në një spital në Torino, por fëmija më i madh në moshë nuk mundi të mbijetonte. Ai më i riu, është po ashtu një shtetas izraelit, i është nënshtruar një operacioni dhe është në gjendje kritike. Distanca 20 minutëshe me teleferik, e frekuentuar shumë nga turistët, lidh Stresa-n me majën 1500 metra të lartë të malin Mottarone dhe ofron një pamje spektakolare të alpeve. Europa ka parë një numër aksidentesh të ngjashme në vitet e fundit. Nëntë alpinistë gjermanë humbën jetën në 2005, kur një bllok betoni me peshë 800 kg ra nga një helikopter që po e transportonte atë afër resortit austriak të Soeldenit në Tirol, mbi teleferikun e tyre. në shkurt 98, një avion ushtarak amerikan që fluturonte poshtë këputi kabujt e teleferikut në Cavalese, një resort skish në dolomite në itali duke vrarë 20 persona.