Një ngjarje e rëndë është regjistruar pasditen e së shtunës në Fushë Arrëz, ku si pasojë e kontaktit me energjinë elektrike, janë regjistruar 3 humbje jete. Viktimat janë nëna dhe dy vajzat e saj, përkatësisht Prendushe Kola 43 vjeçe, dhe dy vajzat Sidorela dhe Emiljana Kola 19 dhe 16 vjeçe. Burime bëjnë me dije se ka qenë vajza e madhe e cila ka qenë duke bërë dush kur ka rënë në kontakt me energjinë elektrike dhe më pas edhe e motra e cila ka shkuar për t’i ardhur në ndihmë. Pas kësaj edhe Prendushe Kola, e ëma e 2 vajzave ka rendur për të shpëtuar të bijat, por edhe ajo si pasojë e kontaktit me energjinë elektrike ka humbur jetën.