Parlamenti i nis punimet në session të ri në 18 janar, duke përjashtuar seancën plenare të datës 4, e cila është konsideruar urgjente për shkak të zhvillimeve në kabinetin e kryeministrit Rama. Por, në axhendën e punimeve të Parlamentit është edhe një ligj i ri që do diskutohet fillimisht në komisionet parlamentare, e më pas do votohet nga deputetët. Bëhet fjalë për një ligj të ri të gardës së Republikës, që ka plot 70 nene me detyra specifike, e ku bie në sy zgjatja e periudhës kohore për ruajtjen nga Garda e Republikës të personaliteteve të larta shtetërore pas mbarimit të mandatit. Kështu parashikon projektligji i ri për Gardën e Republikës, i hartuar nga Ministria e Brendshme. Nisma ligjore parashikon mbrojtje personale të Presidentit nga garda për pesë vjet pas përfundimit të mandatit, nga 3 vjet që parashikon ligji në fuqi. Nëse mandati i Presidentit aktual Ilir Meta mbaron në vitin 2022, mbrojtja nga garda do të vijojë deri në vitin 2027.