19 protestuesve u janë caktuar masa sigurie pas protestave të zhvilluara në Tiranë. Gjykata ka vendosur arrest me burg për një person, arrest në shtëpi për gjashtë të tjerë dhe detyrim paraqitjeje për 12 protestues. Mes personave ndaj të cilëve është caktuar masa e arrestit në shtëpi është edhe Klevi Metaj, ndërsa Abudllah Thaci është lënë në arrest me burg. Pas vendimit të gjykatës, avokatët e disa prej protestuesve reaguan për masat e sigurisë të caktuara ndaj personave të arrestuar gjatë ditës së parë të protestës. Avokati Marash Logu tha se, sipas tij, prokuroria kishte paraqitur si provë vetëm pjesëmarrjen në protestë. Ai argumentoi se pjesëmarrja në një protestë nuk përbën vepër penale dhe nuk mund të shërbejë si bazë për arrestim apo për caktimin e një mase sigurie. Sipas avokatit, gjykata caktoi arrest me burg për një protestues, arrest në shtëpi për gjashtë të tjerë dhe detyrim paraqitjeje për 12 persona. Logu deklaroi gjithashtu se shtatë prej protestuesve kishin shenja dhune. Ai tha se Klevis Meta ndodhet në Spitalin e Traumës dhe pretendoi se protestuesit ishin dhunuar gjatë ndalimit, shoqërimit dhe mbërritjes në komisariat. Ndërkohë, avokatja Adriana Kalaja deklaroi se personat e paraqitur para gjykatës ishin studentë. Sipas saj, ata paraqitën prova për dhunën që pretendojnë se është ushtruar ndaj tyre nga policia.