Studentët e Fakultetit të Drejtësisë njoftuan përshkallëzim proteste të hënën. Duke nisur nga ora 10:00 ata thanë se do të bllokojnë autostradën për 24 orët në vijim. Në një njoftim në platformën X ata thanë se gjatë orëve të protestës do të organizohen aktivitete të ndryshme ndërsa bën ftesë për pjesëmarrje masive. “Do të kemi çadra dhe ngrohës, si dhe disa aktivitete si “Çaj me nxënës”, turne në futboll, minifutbolli, shahu e shumë të tjera”, deklaruan studentët të cilët për më shumë se dy muaj po bllokojnë fakultetet duke kërkuar drejtësi për vdekjen e 15 personave nga shembja e strehës në Stacionin Hekurudhor në Novi Sad, më 1 nëntor. Kërkesat e studentëve për ndalimin e bllokadave përfshijnë publikimin e dokumentacionit të plotë për rindërtimin e Stacionit Hekurudhor të Novi Sadit, për të përcaktuar përgjegjësinë për aksidentin e 1 nëntorit, 2024. Ata gjithashtu kërkojnë që agresorët e demonstruesve, gjatë protestave që pasuan pas aksidentit në Serbi, të identifikohen dhe të përballen me përgjegjësi penale. Kërkesat përfshijnë edhe lirimin e aktivistëve të arrestuar gjatë protestave, ndalimin e procedurave penale kundër tyre, si dhe rritjen e buxhetit për universitetet.