Është mbajtur këtë të enjte, seanca e radhës në GJKKO për ish-ministrin e Mbrojtjes, Fatmir Mediu për çështjen ‘Gërdeci’. Shkëlzen Berisha, i cili ishte thirrrë për të dëshmuar nuk u paraqit dhe nuk u gjet në banesë nga policia gjyqësore. Sipas prokurorit, në dëshminë e parë të dhënë nga Berisha, kishte një adresë tjetër banese, ndërsa tashmë ka ndryshuar vendodhje. Në seancën që zgjati gati 3 orë, dëshmuan vetëm 3 persona, Aldo Bumçi ish-ministër i Drejtësisë, sekretarja e tij në atë kohë Alma Zili dhe Plarent Rrukam ish-këshilltar ligjor i Fatmir Mediut. Ish-ministri i Mbrojtjes Fatmir Mediu, pas mbylljes së seancës tha se kërkon që të dalë e vërteta jo vetëm për të, por për të gjithë çështjen Gërdeci. Mediu tha se sot ka vënë në dispozicion të hetimeve edhe një dokument të policisë ushtarake, ku thuhet se përpara se të bëhej demontimi kishte filluar puna për prishjen e objektit në mënyrë të kundraligjshme.