Drejtori i Përgjithshëm i Policisë së Shtetit, Skënder Hita, ka zhvilluar takime me drejtuesit e strukturave policore në Elbasan, Berat dhe Kukës, ku ka kërkuar forcimin e masave të sigurisë dhe rritjen e efektivitetit në parandalimin e kriminalitetit. Në prag të nisjes së vitit të ri shkollor, siguria në shkolla është vendosur mes prioriteteve kryesore. Hita ka kërkuar angazhim maksimal nga strukturat policore dhe bashkëpunim të ngushtë me oficerët e sigurisë, me qëllim garantimin e një mjedisi të sigurt për nxënësit. Një vëmendje e veçantë do t’i kushtohet zonave pranë shkollave, ku strukturat e antidrogës, forcat “Shqiponja” dhe njësitë operacionale do të intensifikojnë kontrollet për të parandaluar shpërndarjen e lëndëve narkotike dhe konfliktet mes të rinjve. Drejtori i Përgjithshëm ka kërkuar gjithashtu forcimin e luftës kundër armëmbajtjes pa leje dhe shpërndarjes së narkotikëve, si edhe vijimin e punës për kapjen e personave të shpallur në kërkim. Gjatë takimeve, Hita ka kërkuar monitorim më të madh të qarkullimit rrugor dhe përdorimin e mjeteve inteligjente për evidentimin dhe ndëshkimin e shkeljeve, me synim parandalimin e aksidenteve. Ai u ka kërkuar drejtuesve vendorë të Policisë të mbajnë përgjegjësi të drejtpërdrejtë për situatën e sigurisë në territoret që mbulojnë dhe të reagojnë me shpejtësi ndaj çdo problematike. Po ashtu, Hita ka theksuar rëndësinë e komunikimit etik dhe profesional të punonjësve të Policisë me qytetarët, duke u kërkuar efektivëve të dëgjojnë shqetësimet e tyre dhe të angazhohen për zgjidhjen e tyre.