Kosova raportoi të martën 17 viktima nga koronavirusi dhe 557 raste të reja. Instituti Kombëtar i Shëndetësisë Publike tha se rastet e reja rezultojnë nga testimi i 1,541 mostrave. Numri më i madh i tyre është në Komunën e Prishtinës: 217. Instituti raportoi edhe për 727 pacientë të shëruar nga koronavirusi. Me këto shifra, numri i përgjithshëm i të infektuarve në Kosovë arrin në 43,881, i viktimave në 1,137 dhe i të shëruarve në 30,157. Rastet aktive në vend janë ndërkohë 12,587. Ndërkohë, në maqedoninë e veriut, bilanci ditor i raportuar të martën, tregoi 1120 raste të reja me koronavirus dhe 28 viktima. Sipas autoriteteve, në këto 24 orë të shkuara, janë shëruar ndërkohë 916 peresona. Në anën tjetër, Mali i zi ka njoftuar një seri masash të reja kundër pandemisë, mes të cilave, rikthimi i ndalim qarkullimit gjatë natës dhe reduktim të orëve të punës me qëllim vënien nën kontroll të përhapjes së koronavirusit. Sipas masave të reja, njerëzit nuk do të mund të dalin nga shtëpitë nga ora 22 e mbrëmjes deri në 5 të mëngjesit. Baret dhe restorantet do të qëndrojnë të hapura deri në orën 18.00 pasdite ndërsa dyqanet deri në orën 20.00. Mali i zi, me një popullatë prej rreth 622 mijë banorësh, ka aktualisht 10368 raste aktive të koronavirusit dhe që nga fillimi i pandemisë, janë mbi 38500 të infektuarit dhe 543 viktimat. Ndërkohë edhe greqia raporton sërish shifra të larta. 102 viktima dhe 1832 raste të reja është bilanci i 24 orëve të fundit.