Policia e Durrësit ka arrestuar një 51-vjeçar pasi është kapur nga Policia Kufitare duke transportuar 4 shtetas kosovarë me dokumente të personave të tjerë. Shërbimet e Policisë Kufitare, në zbatim të masave për parandalimin dhe goditjen e veprimtarisë të aktivitetit kriminal në fushën e dhënies së ndihmës shtetasve të huaj për kalim të paligjshëm të kufirit, kundrejt shpërblimit, kanë intensifikuar kontrollet, si në dalje ashtu dhe në hyrje, në Portin e Durrësit. Si rezultat i kontrolleve të shtuara, shërbimet e Policisë kanë ndaluar një mjet furgon tip “Benz”, me drejtues shtetasin me inicialet S. N., ku ndodheshin 4 shtetas kosovarë, të cilët do i ndihmonte të kalonin në mënyrë të kundërligjshme kufirin e Republikës së Shqipërisë, nëpërmjet Pikës Kufitare të Portit të Durrësit, kundrejt fitimit, duke përdorur dokumente të ngjashme me të disa shtetasve të tjerë. Vetë trafikanti ishte banues në Belgjikë. Gjithashtu u proceduan penalisht për veprën penale “Kalim i paligjshëm i kufirit shtetëror” 4 shtetasit nga Kosova. Në cilësinë e provës materiale u sekuestruan dokumentet e përdorura nga këta shtetas dhe automjeti me të cilin po transportoheshin. Materialet i kaluan Prokurorisë së Rrethit Gjyqësor Durrës, për veprime të mëtejshme.