Agjencia ndërkombëtare e vlerësimit Moody’s Ratings, rikonfirmoi vlerësimin afatgjatë të kreditit sovran të Shqipërisë në ‘Bs3’ me perspektivë të qëndrueshme. Rritja reale e PBB-së prashikohet të jetë 3.7% për vitin 2025 dhe 3.5% për vitin 2026. Agjencia parashikon që borxhi publik të arrijë në 53.5% të PBB-së në vitin 2026, e mbështetur nga rritja e fortë ekonomike dhe suficiti primar fiskal. Agjencia ‘Moody’s Ratings’ inkurajon autoritetet të respektojnë rregullat fiskale të përcaktuara në ligjin organic të buxhetit, për uljen e raportit të borxhit të përgjithshëm të qeverisë ndaj PBB-së, çdo vit, derisa të arrijë 45%. Në njoftimin e Ministrisë së Financave, thuhet se ky rikonfirmim i vlerësimit nga Moody's është një tregues mjaft i rëndësishëm i stabilitetit makroekonomik të Shqipërisë dhe progresit të vazhdueshëm të reformave strukturore, çka jep sinjale pozitive për investitorët ndërkombëtarë dhe mbështet objektivat strategjikë të integrimit të vendit në Bashkimin Europian.