Gjyqtari i Shkodrës Albano Çepele është shkarkuar nga detyra pasi KPK evidentoi mungesë burimesh për blerjen e një apartamenti, pas dyshimeve për veprime korruptive dhe probleme me profesionalizmin. Një tjetër aspekt problematik është edhe gjendja shëndetësore e gjyqtarit, i cili vuan nga një sëmundje që i vështirëson aktivitetin fizik. Gjyqtari Albano Çepele shfaqte vështirësi në ecje dhe u paraqit në seancë së bashku me një përfaqësues ligjor. Ai bëri me dije se vuante nga skleroza multiple. Sipas relatores, gjyqtari nuk ka qenë bashkëpunues pasi ka refezuar të japë deklarime për çështje të caktuara, duke përmendur mungesën e sqarimeve për vlerën e mobilimit të shtëpisë. Relatorja ka shtuar se nuk ishte pasqyruar burimi i krijimit për një apartament me sipërfaqe 86.8 m2 blerë në vitin 2006 në Tiranë në shumën e 30 mijë eurove. KPK gjithashtu konstatoi mungesë dokumentacioni ligjor për të justifikuar burimin e vlerës 30 mijë euro të dhënë hua nga motra e subjektit për blerjen e apartamentit. Ndërkaq gjyqtari kishte dhënë gjithashtu edhe deklarime kontradiktore sa i takon çmimit të ulët të apartamentit.