Ky është momenti kur një “shi” shkëndijash elektrike ra mbi kalimtarët e tronditur, pasi një rrufe goditi kabllot e tramvajit në Rusi. Pamjet e pabesueshme u filmuan nga kamerat e rrugës gjatë një stuhie shiu në Shën Pëtersburg, më 19 maj. Në video duket një dritë e fortë që ndricon kalimtarët teksa ecin në rrugë. Shkreptima ndiqet menjëherë nga një gjëmim shurdhues. Pastaj një mori shkëndijash elektrike bien mbi rrugë, duke i bërë njerëzit të ndalojnë duke parë të cuditur. Një tjetër video e bërë në distancë nga vendi i ngjarjes, tregon një shpërthim të madh në momentin e rrufesë. Një dëshmitar tha se incidenti ishte si i frikshëm, ashtu edhe mahnitës. Sipas burimeve lokale, fenomeni kishte ndodhur kur një rrufe goditi kabllot e tramvajit. Shkarkesa e madhe elektrike shkaktoi edhe shpërthimin dhe shkëndijat. Nga sa bëhet e ditur, nga incidenti nuk pati të lënduar.