Shefja e Komisionit Evropian tha të hënën se liderët e BE do të mbajnë një samit, nga ku do t’i japin një përgjigje të fortë Bjellorusisë pas bllokimit të avionit ku ishte opozitari i regjimit Roman Protasevich, dhe arrestimit të tij. Ndërkohë që liderët mbërrinin në Bruksel, von der Leyen tha se presidenti Lukashenko dhe regjimi i tij, duhet ta dinë që do të përballen me pasoja të rënda. Të dielën, kanali i opozitës bjelloruse në rrjetin Telegram, njoftoi se ish-kryeredaktori i tij, njëkohësisht opozitari në mërgim, Roman Protasevich, u ndalua në Minsk pasi avioni RyanAir me të cilin po udhëtonte, bëri një ulje të detyruar, me urdhër të presidentit Lukashenko. Kjo vjen në vazhdën e represionit qeveritar, që pasoi demonstratat e fuqishme kundër zgjedhjeve presidenciale të vitit të kaluar. Kanalet NextaLive dhe Nexta, me gati 2 milionë ndjekës në rrjetin Telegram, shquhen si zëri i fortë i opozitës bjelloruse dhe si nxitëse të protestave. Bjellorusët pushtuan rrugët duke kërkuar dorëheqjen e Lukashenkos, i cili sundon vendin me dorë të hekurt që prej dy dekadash, dhe gushtin e kaluar siguroi një fitore të thellë në një proces zgjedhor që opozita e konsideron të manipuluar. Të dielën Protasevich mori një avion nga Athina për në kryeqytetin e Lituanisë Vilnius.