Donuts, dollarë apo bonuse në rrjetet sociale? Krispy Kreme u po u ofron ëmbëlsira falas atyre që kanë bërë vaksinën kundër Covid-19, disa shtete të SHBA kanë hapur lotari me cmimë cash për të vasksinuarit, kurse disa aplikacione për takime dashurore po ofrojnë shërbime shtesë kundrejt provës që keni bërë vaksinën. Në përpjekje për të nxitur njerëzit “të bëjnë gjilpërën”, disa shtete si Ohio, New York dhe Maryland, po shpërndajnë miliona dollarë përmes lotarive të posaçme. Kjo nismë e qeverive, punëdhënësve, ekipeve sportive, etj., ka për qëllim të motivojë sa më shumë njerëz, në një kohë kur ritmet e vaksinimit kanë pësuar rënie. Ndërkohë, Shtëpia e Bardhë po provon edhe një mënyrë tjetër. Ajo njoftoi sot, se po bashkëpunon me disa rrjete takimesh romantike, për t’u ofruar klientëve bonuse të ndryshme. Përdoruesit e vaksinuar të rrjeteve si Tinder, Hinge, OKCupid, BLK, Chispa, Plenty of Fish, Bumble dhe Badoo, do marrin shërbime premium si “like boosts, super likes, dhe super swipes” në këmbim të provës që janë vaksinuar. Po ashtu ata do mund t’i filtrojnë rezultatet e partnerëve të mundshëm në bazë të statusit të vaksinimit, dhe madje do mund të prenotojnë edhe datën e vaksinimit përmes aplikacionit. E gjitha kjo, ka ngjallur reagime pozitive dhe negative. Ideja që disa amerikanëve duhet t’ua mbushësh mendjen me para, për të bërë një vaksinë që të shpëton jetën, mund t’u duket absurde miliona njerëzve në grupe risku si dhe punonjësve spitalorë të vendeve në zhvillim, të cilët ende nuk po mund të vaksinohen. Në këto vende, programi COVAX që po shpërndan vaksinën, do mund të vaksinojë vetëm 27% të popullatave me të ardhura të ulta këtë vit. Pjesa tjetër do të duhet të presë të paktën deri vitin e ardhshëm.