Ambasadori amerikan në Serbi, Christopher Hill, tha se SHBA mbështet Bashkimin Evropian në përpjekjet për të arritur një zgjidhje në dialogun mes Kosovës dhe Serbisë. “[Problemi] ka vazhduar për një kohë shumë të gjatë dhe është koha për përparim", u tha Hill gazetarëve në një Forum Rajonal për Evropën dhe Euroazinë - EducationUSA në Beograd. Ambasadori amerikan nuk pranoi të komentojë planin e pretenduar për kornizën e re të dialogut mes Kosovës dhe Serbisë, që është hartuar pas angazhimit të të dërguarve nga Gjermania dhe Franca. “Nuk më takon mua të komentoj propozimet, përveçse të them se SHBA-ja mbështet BE-në, e cila po përpiqet shumë të gjejë një zgjidhje të pranueshme për të gjithë dhe kjo nuk është e lehtë”, tha Hill. Presidenti Serb Aleksandar Vuçiç, tha pak ditë më parë se diplomatët evropianë kanë propozuar “kornizë të re” për dialogun mes Prishtinës dhe Beogradit. Përfaqësuesi special i BE-së për dialogun, Miroslav Lajçak, në anën tjetër u shpreh i befasuar nga kjo deklaratë.