Diplomatët rusë dhe amerikanë do të takohen në Stamboll të enjten, tha ministri i jashtëm rus Sergei Lavrov, për bisedime mbi zgjidhjen e mosmarrëveshjeve dypalëshe që janë pjesë e një dialogu më të gjerë që ata e shohin si vendimtar për t'i dhënë fund luftës në Ukrainë. Lavrov tha se bisedimet do të fokusohen në krijimin e kushteve më të mira për diplomatët rusë në Shtetet e Bashkuara dhe homologët e tyre amerikanë në Rusi, pas një sërë mosmarrëveshjesh mbi nivelin e personelit dhe pronat e ambasadave. Rezultati i bisedimeve të Stambollit - të cilat pasojnë një telefonatë mes presidentëve Vladimir Putin dhe Donald Trump më 12 shkurt dhe një takim të nivelit të lartë ruso-amerikan të mbajtur në arabinë saudite më 18 shkurt, "do të tregojë se sa shpejt dhe efektivisht mund të lëvizim," tha Lavrov. Trump ka thënë se dëshiron të lëvizë shpejt drejt një armëpushimi në Ukrainë, por Putini këtë javë zbuti pritshmëritë për përparim të shpejtë, duke thënë se asgjë nuk mund të arrihet pa rivendosjen e besimit midis Rusisë dhe Shteteve të Bashkuara. Axhenda për bisedimet e së enjtes, siç përshkruhet nga Lavrov, sinjalizon se të dy palët do të fokusohen së pari në barrierat teknike për marrëdhëniet diplomatike përpara se të kalojnë tek qëllimet më ambicioze. Lavrov fajësoi për situatën e krijuar administratën e paraardhësit të Trump, Joe Biden.